Informação
CONTADOR MENSAL

Locations of visitors to this page


REALTIME





    Album de Miguelsf>> página inicial   

    Fotos:
   Textos:
-Introduçám!-
Qui nova vosotro! 

Antis di começâ, iou tem qui pedí perdâm co Mana Gina (Virgínia). Iou, cavá intiçâ Mana pa iscrevê ancusa na língu maquista pa estunga site, sâm iou qui nom podi cumprí palavra.

 

Sâm divéra, unga instante ui-di tanto trabálio. Sâm assi-ia, tudo genti querê fazê tudo ancusa na ultima ora. Cavá pussâ bafado, féria-féria já vem-ia. Iou levâ tudo iou-sa catravada vai Tailandia. Tudo-dia, si nom sâm nadâ, sâm panhâ sol. Iou-sa fila pequinina falâ, antes di nôs vai, iou-sa cara sâm di china chapado, cavâ vem di féria, sâm ramendâ unga filipino. Iou-sa siara falâ iou más parecido co tancaréro...!

 

Masquí-ia!

 

Iou divéra contente pode tem unga cantinho pa botâ quanto-cento di chiste pa alegrâ nos-sa genti. Certo, n'unga site di comizaina co bebezaina, quelê-modo pode faltâ Língu  maquista? Si tem ancusa más quirido pa nôs Macau-filo-filo, sâm nôsso língu. Genti falâ qui língu maquista sâm igual papiaçâm na português erado. Já olâ seléia boboriça? Nôsso língu sâm nôsso tesóro.

 

Por isso iou tem qui batê palma pa Fausto, qui jâ iscrevê na patois historia-historia qui chistoso. Nôs tudo amestê seguí ele-sa exemplo. Quim falâ nom sabe papiâ, pode aprendê. Quim somente sabe papiâ unchinho, nomestê vergonha.

 

Sâm assi-ia. Né bom bafo comprido! Más bom sâm iou começâ co estunga cantinho!

 

Unga uchám pa tudo genti-genti!